AZƏRBAYCAN MİLLİ                  ELMLƏR AKADEMİYASI
YER ELMLƏRİ BÖLMƏSİ
Foto
Məktəblilər Binəqədidə qazıntı zamanı kərgədan və digər heyvanların sümüklərini aşkarlayıblar
May 26, 2016 | 09:35 / Maraqlı məlumatlar
Oxunub 433 dəfə

Bakı Avropa Liseyinin 11-ci sinif şagirdləri Azərbaycan Milli Elmlər Akademiyası Geologiya və Geofizika İnstitutunun H.Zərdabi adına Təbiət Tarixi Muzeyinin Binəqədi fauna və flora qəbiristanlığında olublar. Orada muzeyin əməkdaşları onlar üçün tədqiqat və təcrübə mühiti təşkil ediblər. Məktəblilər buz dövründən qalmış və 100 min ildən çox yaşı olan paleontoloji ərazidə 3 ay qazıntılar aparıblar. “Sabahın alimləri” müsabiqəsi çərçivəsində həyata keçirilmiş çöl işləri zamanı gələcəyin tədqiqatçıları kərgədanın qabırğa və bud sümüklərini, quşların kəllə və digər hissələrini, həmçinin yüzlərlə böcəklər aşkarlayıblar. Liseyin fəalları müsabiqədə respublika üzrə 3-cü yerə layiq görülüblər.

Muzey may ayında açıq muzey həftəsində 2700-dən çox şagird, müəllim və valideyn qəbul edib. Abşeron yarmadasında yaşayan ziyarətçilər 50-dən çox məktəbi təmsil ediblər. Məktəblilərə muzeyin kolleksiyası, o cümlədən onurğalı və onurğasız heyvanlar, faydalı qazıntı tapıntıları haqqında geniş məlumat verilib.

Bundan əlavə, 6 universitetin ümumən 150-dən çox tələbəsi də muzeyi ziyarət edib.

Copyright © AMEA İnformasiya Texnologiyaları İnstitutu, 2015