Aug 31, 2023 | 09:50 Konfranslar, iclaslar
Elm və Təhsil Nazirliyi akademik H.Əliyev adına Coğrafiya İnstitutu Vikipediya qrupunun rəhbəri Aida Aslanova 4 nəfərdən ibarət nümayəndə heyətinin tərkibində Sinqapurda keçirilən beynəlxalq “Vikimaniya” konfransında Azərbaycanı təmsil edib.
Hər il keçirilən beynəlxalq Vikimaniya konfransından əsas məqsəd vikipediyaçıları görüşdürmək, onların bir-birilərinin vikipediyadakı gələcək planları haqqında informasiya əldə etməyə şərait yaratmaq olub.
Təmsilçimiz konfrans müddətində 10-dan çox vikimediya layihəsinin təlimlərində iştirak edib, fikir mübadilələri aparıb, türkdilli dövlətlərin görüşündə yeni layihə ideyası ilə çıxış edib. Milli geyimdə ölkəmizi təmsil edən qrup rəhbəri Vikipediyanın yaradıcısı Jimmi Uels ilə xatirə fotosu çəkdirib.
Qeyd edək ki, A.Aslanova AR Gənclər və İdman Nazirliyi və Azərbaycandilli vikipediyada fəaliyyət göstərən Azərbaycan vikimediyaçıları istifadəçi qrupunun gənc vikipediyaçılar üçün təşkil etdiyi yay düşərgəsində təlimçi qismində iştirak edib. Lənkəran Olimpiya İdman Kompleksində 4 gün davam edən düşərgədə gənclər müxtəlif vikimedia layihələri üzrə təlim və seminarlar vasitəsi ilə Vikipediya, Vikiverilənlər, Vikianbar və s. mövzular üzrə biliklər əldə ediblər.
Tədbirin təşkilatçıları bağlanış mərasimində A.Aslanovaya sertifikat təqdim edərək düşərgənin təşkilindəki fəaliyyətinə görə ona minnətdarlıq bildiriblər.
