Oct 27, 2023 | 14:39 Görüşlər
Gürcüstan Respublikasının paytaxtı Tbilisi şəhərində ABŞ Enerji Departamenti Milli Nüvə Təhlükəsizliyi İdarəsinin dəstəyi, Ukrayna Elm və Texnologiya Mərkəzinin təşkilatçılığı ilə “Qafqazda və Mərkəzi Asiyada seysmik şəbəkənin genişləndirilməsi” layihəsi üzrə tərəfdaş ölkələrin nümayəndə heyətlərinin toplantısı keçirilib. Toplantıda Azərbaycan, Gürcüstan, ABŞ, Qazaxıstan, Qırğızıstan, Gürcüstan, Tacikistandan və digər ölkələrdən nümayəndə heyətləri iştirak ediblər.
İclasda Azərbaycanı AMEA nəzdində Respublika Seysmoloji Xidmət Mərkəzinin baş direktoru AMEA-nın müxbir üzvü, professor Qurban Yetirmişlinin rəhbərliyi ilə RSXM-nin əməkdaşlarından ibarət nümayəndə heyəti təmsil edib. RSXM-nin Zəlzələ ocaqlarının dinamikası şöbəsinin müdiri geologiya-mineralogiya üzrə fəlsəfə doktoru, dosent Səbinə Kazımova “Qafqazda və Mərkəzi Asiyada seysmik şəbəkənin genişləndirilməsi” layihəsi çərçivəsində Azərbaycanda görülmüş işlər haqqında çıxış edib. Tərəfdaş ölkələr arasında aparılan müzakirələrdən sonra layihənin müddətinin bir il uzadılması razılaşdırılıb.
Xatırladaq ki, “Qafqazda və Mərkəzi Asiyada seysmik şəbəkənin genişləndirilməsi” layihəsi çərçivəsində Azərbaycan ərazisində 22 yeni seysmik stansiya quraşdırılıb.
