![](http://yeb.science.gov.az/uploads/news/1717070764.jpg)
May 30, 2024 | 16:04 Görüşlər
Azərbaycan Dillər Universitetində Elm və Təhsil Nazirliyinin akademik H.Əliyev adına Coğrafiya İnstitutunun baş direktoru professor Zakir Eminov və Xəzər dənizinin hidrometeorologiyası şöbəsinin müdiri coğrafiya elmləri doktoru Səid Səfərovun Tərcümə fakültəsinin tələbələri ilə görüşü keçirilib.
COP29-a həsr olunmuş tədbirdə professor Z.Eminov çıxış edərək Azərbaycanda və dünyada baş verən iqlim dəyişmələri, onların səbəb və nəticələri, Xəzər dənizinin səviyyə dəyişmələrinin öyrənilməsi və ölkədə aparılan ümumi iqlim tədqiqatları haqqında məlumat verib. Bildirib ki, bu gün iqlim dəyişmələri ilə baş verən proseslər artıq dünyanın bütün regionlarında hiss olunur və mənfi nəticələr güclənir. Bunları nəzərə alaraq ilin sonunda BMT çərçivəsində beynəlxalq səviyyədə COP29 konvensiyası keçiriləcək. Ölkədə iqlimin dəyişməsi, ona uyğunlaşma tədbirlərinin işlənib hazırlanması, su ehtiyatlarından səmərəli istifadə olunması, Xəzər dənizinin öyrənilməsi sahəsində tədqiqatlar bundan sonra da ciddi şəkildə aparılmalıdır.
C.e.d. S.Səfərov tələbələrlə görüşdə Xəzər dənizinin səviyyə dəyişmələri, onun yaxın gələcəkdə vəziyyəti, iqlim dəyişmələrinin öyrənilməsi, dünyada baş verən hidrometeoroloji proseslərin Xəzərin səviyyə dəyişmələrinə təsiri, Azərbaycanda bu istiqamətdə həyata keçirilməsi vacib olan tədbirlər və s. barədə iştirakçılara məlumat verib.
Sonda Universitetin rektor köməkçisi Anar Osmanov tədbirdə iştirakına görə coğrafiyaçı alimlərə təşəkkürünü bildirib.